Yanvarın 24-də Azərbaycan Ordusunun əsgəri intihar edib. Gəncədəki “N” saylı hərbi hissədə xidmət edən 24 yaşlı əsgər Elbrus Mübariz oğlu Rəhimov qulluq etdiyi hərbi hissədə özünü asıb. Bu barədə ANS-ə əsgərin qardaşı Pərviz Rəhimov məlumat verib. Onun sözlərinə görə, qardaşı ilə yanvarın 23-də telefonla danışıbmış. Danışıq zamanı Elbrus ona heç bir şikayətinin olmadığını deyib. Ertəsi gün isə hərbi hissədən zəng edərək əsgərin intihar etdiyi barədə xəbər veriblər. Əsgərin meyiti artıq ailəsinə təhvil verilib. Qardaşı deyib ki, Elbrusun üzərində intihar əlamətləri olmayıb və meyit yarılıb.
Qeyd edək ki, 1985-ci il təvəllüdlü Elbrus Rəhimov 2008-ci ilin iyun ayında Nərimanov rayon Hərbi Komissarlığından hərbi xidmətə çağırılıb. Sumqayıt Dövlət Universitetinin tarix fakültəsini qırmızı diplomla bitirən E.Rəhimov 4 aydan sonra hərbi xidmətini başa vurmalıydı. Əsgər hərbi hissənin dəftərxanasında işləyirmiş. “Qaynar info” mərhumun ailəsinə istinadən xəbər verib ki, ailəsi mərhumun intihar etməsinə inanmır: “İntihar etdiyi günün səhəri qardaşı ilə telefonla danışan Elbrus son 2-3 gündə vəziyyətinin pis olduğunu və incidildiyini deyib”. Müdafiə Nazirliyi mətbuat xidmətinin rəhbəri Eldar Sabiroğlu isə bizimlə söhbətdə bildirdi ki, bu barədə məlumatı yoxdur: “Bu faktın geniş araşdırılması lazımdır. Ona görə də sabah (bu gün - E.) araşdırma aparıb sizə məlumat verərik”.