Aprelin 24-də bir qrup gənc Bakıda kitab oxumağa diqqət çəkmək məqsədilə aksiya keçirib.

Aksiyanın təşəbbüskarı, «Facebook» sosial şəbəkəsində «Oxuyaq, inkişaf edək» qrupunun yaradıcısı Mahmud Nəsirov bildirib ki, məqsədləri gəncləri eyni ideya altında birləşdirmək olub:

«Məqsədimiz gəncləri «Oxuyaq, inkişaf» edək ideyası altında birləşdirməkdir. Universitet həyətlərində, kitabxanalarda, ictimai nəqliyyatda - metroda, avtobusda, parklarda, skamyalarda kitab oxuyan, vaxtlarını səmərəli keçirən gəncləri görməkdir. Biz bir saat ərzində kitab oxuduq. Polislər də gəlirdi, baxırdı. Bizə fərqli baxışlar da var idi, bu, normaldır. Çünki bu kimi tədbirlərə bizdə alışılmayıb, təəssüf ki, ictimaiyyətdə bu şüur formalaşmayıb».

Kitab aksiyası dinc şəraitdə keçib, heç bir müdaxilə olmayıb.

M. Nəsirov deyir ki, bu kimi aksiyaları iki həftədən bir keçirməyi planlaşdırırlar.