Belə ki, artıq 6 həftədir ki, tələbələr Universitet rəhbərliyinə etiraz əlaməti olaraq namazı universitetin bağçasında qılır. 

Telebe.Az-ın Dünya mətbuatına istinadən verdiyi məlumata əsasən, Londonun Siti (City) Universitetinin müsəlman tələbələri universitet tərəfindən onlara namaz qılmaları üçün ayrılan otağın irqçilər tərəfindən hücuma məruz qalması səbəbilə bağlanmasına və sonradan onlara ehtiyaclarını qarşılamayan bir otaq verilməsinə etiraz əlaməti olaraq universitetin bağçasında namaz qılırlar. Müxtəlif etnik və dini nümayəndələrdən ibarət tələbələr qrupu günlərlə ingilis tələbələr və xalqın çaşqın baxışları altında dini öhdəliklərini yerinə yetirirlər.
Universitetin iqtisadiyyat fakültəsinin tələbəsi İmran Nazir (22 yaş) məsələylə bağlı açıqlamasında " 6 həftədir yağışda və küləkdə küçədə namaz qılırıq. Bu bizim dinimizdir və borcumuzu yerinə yetiririk. Noyabr ayında baş vermiş hadisələrlə əlaqədar universitetin bizə otaq ayırmaması həqiqətən üzücüdür və biz ehtiyacımızı ödəyəcək otaq verilməyincə məktəbin önündə namaz qılmağa davam edəcəyik” deyərək, öz fikirlərini bildirib. 

Beynəlxalq Əlaqələr fakültəsinin tələbəsi Rəşid Ansan isə "Universitet hər dinə, inanca açıq olmalıdır. Biz düşüncə və inanclarımızı müzakirə etməliyik və ifadə azadlığımız olmalıdır. Bizim istədiyimiz inancımıza, dinimizə normal münasibət göstərilməsidir”- deyib. 

Londonda fəaliyyət göstərən İslam Dərnəyinin Başçısı Saleh Patel isə "Müsəlman tələbələrə bir otaq verilməməsi və ayrıseçkilik salınmasını böyük haqsızlıq adlandırıb. Bunların hamısı İslamafobiadan qaynaqlanır. Bu qorxu üzündən bizlər haqlarımızı ala bilmirik və haqqımızı alanadək bu etiraz davam edəcək” kimi açıqlama verib.
Universitetin mövqeyindən çıxış edən City Universitetinin Rektor yardımçısı Professor Julius Weinberg, "Noyabrda baş vermiş hadisələr səbəbilə tələbələr üçün ayrılmış otağı təhlükəsizliyi təmin etmək məqsədilə bağlamaq məcburiyyətində qaldıq və tələbələr üçün başqa dinlərə mənsub insanların da istifadə edə biləcəyi bir otaq verdik. Ancaq tələbələr bunu qəbul etmir və başqa dindən olan ibadətçilərlə eyni otağı payla.maq istəmirlər. Bura bir təhsil ocağıdır və bizim əsas məqsədimiz bütün tələbələrə bərabər səviyyədə təhsil verməkdir. Yalnız müsəlman tələbələr üçün xüsusi bir otaq ayırmamız digər tələbələrə qarşı haqsızlıq olar” deyərək, universitetin mövqeyini müdafiə edib.