Əhməd Əhmədzadə: “Hacıqabul rayonunun Meyniman kəndində Kürün yardığı 100 metrlik bənd artıq bərpa olunub”.

APA-nın xəbərinə görə, bunu fəlakət bölgəsində jurnalistlərə açıqlamasında “Meliorasiya və Su Təsərrüfatı” ASC-nin prezidenti Əhməd Əhmədzadə bildirib. ASC prezidenti orada sızmaların olduğunu da qeyd edib: “Bununla bağlı bərkitmə işləri aparılır və onların da qarşısı alınacaq”.

Ə. Əhmədzadə Araz çayından yeni qolun ayrılması ilə bağlı görülən işlərin sürətlə davam etdirildiyini deyib: “Bu proses yaxın zamanlarda başa çatacaq. Çayın bir hissəsi həmin qolla dənizə buraxılacaq. Biz ehtiyat tədbirlər görürük ki, əhali əziyyət çəkməsin”.

O, Ələt-Astara yolunun bağlanması ehtimalının da olmayacağını deyib: “Biz suların boş ərazilərə buraxılmasını təmin edəcəyik. Ona görə də suyun keçdiyi körpüdə tədbirlər görürük ki, su ətrafa yayılmasın. Bunun üçün Biləsuvar rayonu ərazisində yüngül körpülər tikilir”.

Ə. Əhmədzadə daha sonra deyib ki, onda olan məlumata görə, Azərbaycan prezidenti tərəfindən Tovuz rayonu ərazisində su anbarının tikilməsi üçün layihə həyata keçirilməsi ilə bağlı göstəriş verilib: ”Həmin anbarın su tutumu 3 milyard kubmetr olacaq. Bu da çayda suyun nizamlanmasına kömək edəcək. Yeni elektrik stansiyaları tikilsə, əlavə qolların açılmasına ehtiyac qalmayacaq. Hazırda iki yerdən - Biləsuvar ərazisindən və Salyanın 30 kilometrliyindən qolların açılması məqsədəuyğundur”.

ASC prezidenti hazırda Sarısu gölündə vəziyyətin nizamlandığını da açıqlayıb: “Artıq göldən Araza su daxil olub”.

O, Kürdə suyun səviyyəsinin 9 santimetr qalxdığını da qeyd edib: “Bu da Mingəçevir Su Anbarından çaya buraxılan su ilə bağlıdır”