Azərbaycan Dövlət Neft Akademiyasında (ADNA) terror aktının törədilməsinin ildönümü münasibətilə təhsil müəssisəsində anım mərasimi keçirilib. APA-nın məlumatına görə, anım mərasiminə təhsil naziri Misir Mərdanov, ADNA-nın rektoru Siyavuş Qarayev, Akademiyanın müəllim və tələbə kollektivi qatılıb. Onlar terror aktında həlak olanların təhsil müəssisənin 1-ci mərtəbəsində asılmış şəkilləri önünə əklil qoyub, gül dəstələri düzüblər.
M. Mərdanov jurnalistlərə açıqlamasında terror hadisəsini törədənlərlə bağlı ölkə rəhbərliyi və hüquq-mühafizə orqanlarının lazımı tədbirlər gördüyünü bildirib: “Biz isə bu hadisədən özümüz və gələcəyimiz üçün nəticələr çıxarmalıyıq”.
Nazir deyib ki, belə hadisələr Azərbaycanı sarsıda bilməz: “Azərbaycan xalqı müdrik xalqdır. Son yüz ildə dəfələrlə belə və hətta bundan ağır çətinliklərə sinə gərib. Ən vacibi odur ki, çalışacağıq gələcəkdə bizim millətimizə qarşı belə terrorların olmasının qarşısını alaq. Əlbəttə, hər bir vətəndaş da öz işinə məsuliyyətlə yanaşmalı, ətrafda baş verənlərə münasibət bildirməlidir”.
M. Mərdanov bildirib ki, artıq Azərbaycanın bütün ali məktəblərində təhlükəsizlik xidmətləri gücləndirib: “Amma təkcə ali məktəblərin rəhbərliklərinin, bir-iki nəfərin bu işlə məşğul olması belə hadisələrin qarşısının alınması üçün kifayət deyil. Hətta dünyada ən ciddi qorunan obyektlərdə də təəssüf ki, belə hadisələr baş verir. Hər kəs ətrafında baş verənlərə daha diqqətlə yanaşsa, belə hadisələrin qarşısını almaq olar”.
M. Mərdanov onu da bildirib ki, terror zamanı həlak olanların adının əbədiləşdirilməsi ilə bağlı da tədbirlər görüləcək: “Bu hadisəni Azərbaycan vətəndaşı yaddan çıxarmamalıdır”.
Qeyd edək ki, terror aktında həlak olanların xatirəsinə ADNA-da ehsan süfrəsi açılıb.