“Nanotexnologiya” terminini elmə ilk dəfə yapon fiziki Norio Taniquçi gətirib. Nanotexnologiya elmi anlayış kimi 1986-cı ildən işlədilir. Hazırda nanotexnologiyalara münasibətdə "yeni sənaye inqilabı" ifadəsi işlədilir. Nanotexnologiya yeni qeyri-adi xassələrə malik materiallar alınmasına imkan verir. Belə materiallardan elm və texnikanın müxtəlif sahələrində-biotexnologiyada, hərbi işlərdə, tibbdə, ətraf mühitin mühafizəsində və s. istifadə etmək mümkündür.

Nanotexnologiya sahəsində bütün dünyada olduğu kimi Azərbaycanda da intensiv işlər gedir. Yaxın gələcəkdə nanotexnologiya məhsullarının Azərbaycana daxil olacağı proqnozlaşdırılır. Ölkəmizdə yalnız Bakı Dövlət Universitetində nanotexnologiya üzrə kadr hazırlanmaqdadır. BDU-da nanotexnologiya sahəsində elmi tədqiqat işlərini inkişaf etdirmək məqsədilə kimya, fizika, biologiya, tətbiqi riyaziyyat və kibernetika fakültələrinin bazasında “Nano araşdırmalar mərkəzi” açılıb və hazırda nanotexnologiyalar istiqamətində tədqiqat işləri aparılır.

Mərkəzdə polimerin səthində yarımkeçiricilər alınır və polimer yarımkeçirici maddələr hazırlanır. Labaratoriya şəraitində müxtəlif hissəciklər alınır, onların fiziki, kimyəvi xassələri öyrənilir.
2007-ci ildə akademik Abel Məhərrəmovun rəhbərliyi altında yaradılan BDU alimlərindən ibarət qrup Azərbaycan Respublikasında 2015-ci ilə qədər nanotexnologiyanın inkişaf proqramının layihəsi hazırlayaraq Nazirlər Kabinetinə təqdim etməlidir. Ayrı-ayrı nazirliklər və komitələrin layihəni yüksək qiymətləndirməsinə baxmayaraq onun qəbulunda hələ də ləngimələr var.