“Obama andiçmədən əvvəl öldürüləcək, dünyada qiyamət qopacaq”

Amerikanın yeni seçilmiş prezidenti Barak Obamanın öldürüləcəyi haqda proqnozlara biri də əlavə olunub. Bu dəfə belə proqnozla məşhur amerikalı mormon kahini (“mormon” xristianlıqda təriqətlərdən biri olub əsasən Amerikada mövcuddur), özünü Peyğəmbər elan edən Leland Friborn çıxış edib. Üstəlik, o xəbərdarlıq edib ki, Obamaya sui-qəsddən sonra əsl qiyamət qopacaq.

“Los Angeles Times” qəzetinin yazdığına görə, ABŞ-da münəccimliyi ilə məşhur olan Friborn deyib ki, Obama andiçmə mərasimindən əvvəl ya öldürüləcək, ya da ağır yaralanacaq. Bunun ardından üsyanlar başlayacaq, Rusiya isə yaranmış qarışıqlıqdan istifadə edərək ABŞ-a nüvə zərbəsi endirəcək. “Bu yeni ildə əsl qiyamətə hazır olun”, - deyə o, tərəfdarlarına xəbərdarlıq edib. Friborn bildirib ki, Rusiyanın nüvə hücumu nəticəsində Amerikada 100 milyon adam öləcək. Onun Rusiyanın ABŞ-a nüvə bombası atacağı vaxtı özünün harada olacağını da bildirib: “Bu zaman mən Wal-Mart supermarketində alış-verişdə olacağam”. Bildirilir ki, Fribornun bu proqnozları amerikalıları qorxuya salıb. Hətta onun münəccimliyinə şübhə edənlər belə bu proqnozlardan qorxuya düşüblər.

Xatırladaq ki, Obamanın öldürüləcəyi haqda proqnozlar bundan əvvəl də məşhur adamların dilindən səslənib. Amerikanın xüsusi xidmət orqanları isə artıq bir neçə dəfə Obamaya sui-qəsd planlarının qarşısını alıblar. Qəzetin yazdığına görə, Friborn 12 yaşında olarkən atasının kiçik təyyarəsində 1975-ci ildə qəzaya düşüb. Ağır yaralanıb və 3 həftə komada qalıb. Ayılandan sonra o biri dünyadan qayıtdığını deyib. 66 yaşlı mormonun bu təriqətin qaydalarına uyğun olaraq çoxsaylı arvadları var, kilsə ilə yollarını ayırıb və uzun illər özünün peyğəmbərliyini sübut etmək üçün bütün pullarını xərcləyib. Hazırda Utah ştatında kiçik evdə yaşayır. Əvvəllər də Friborn bir çox hadisələrlə bağlı proqnozlar verib. Ancaq onun budəfəki proqnozu daha geniş əks-səda doğurub.