Həkimlər 6 aylıq körpəni bir neçə saniyəlik artıq heç nə hiss etməyən anasının sinəsi üzərinə qoyublar
Böyük Britaniyada 41 yaşlı qadın ölümündən 2 gün sonra uşaq dünyaya gətirib. həkimlər fiqurlu konkisürmə üzrə keçmiş ölkə çempionu Ceyn Süleymanın beyninə qan sızması nəticəsində beyin ölümünü qeydə alıblar.
Qadın hamiləliyinin 25-ci həftəsində başındakı ağrılardan şikayət edib və qəflətən huşunu itirərək yerə yıxılıb. Onu dərhal Oksforddakı Con Redkliff klinikasına aparıblar. Həkimlər müəyyən ediblər ki, onun beyninə qan sızıb. Artıq qadını xilas etməyin mümkün olmadığını anlayan doktorlar uşağın həyatı uğrunda mübarizəyə başlayıblar.
Beyni ölən qadının ürək döyüntüsü iki gün ərzində süni şəkildə saxlanılıb. Bu müddət ərzində uşağın ciyərlərinin sərbəst nəfəs alması üçün qadının bədəninə yüksək dozada kortikosteroidlər yeridilib. Yanvarın 9-da 25 həftəlik uşaq (təxminən 6 aylıq) qeysər kəsiyi əməliyyatı vasitəsilə dünyaya göz açıb. Hazırda uşaq Redinqdəki Kral xəstəxanasında xüsusiləşdirilmiş intensiv terapiya şöbəsində saxlanılır. Həkimlər onun normal inkişaf etdiyini bildirirlər.
Ceyn Süleymanın 29 yaşlı həyat yoldaşı Mahmud Süleyman göz yaşlarını saxlaya bilməyib: “Ceynin yeganə arzusu ana olmaq idi. O, çox yaxşı ana olacaqdı”. Mahmud son ana qədər Ceynin yanında olub və süni nəfəsalma qurğularının onun bədənindən ayrıldığını görüb. Həkimlər 6 aylıq körpəni bir neçə saniyəlik artıq heç nə hiss etməyən anasının sinəsi üzərinə qoyublar və sonra atasının qucağına veriblər.
Qızlıq soyadı Kempbell olan Ceyn Süleyman 1989-cu ildə Böyük Britaniyanın fiqurlu konkisürmə üzrə çempion olub. Elə həmin il dünya çempionatında 7-ci yeri tutub. Böyük idmanı buraxandan sonra Abu-Dabidə məşqçi işləyib və elə oradaca gələcək həyat yoldaşı – misirli Mahmud Süleymanla tanış olub. Onlar 2007-ci ildə evləniblər. Ceyn toydan əvvəl İslamı qəbul edib.
Valideynləri oğlan doğulduğu təqdirdə onu Əli, qız doğulsa Meqqi adlandırmaq qərarına gəliblərmiş. İndi isə Mahmud fikrini dəyişib. O, faciədən sonra qızını Ayya Ceyn adlandırıb. Ayya ərəb dilində “möcüzə” deməkdir.
Ceyn Süleyman yanvarın 10-da Redinq şəhərinin məscidində dəfn edilib