- Özünüz haqqında məlumat verin. ABŞ-da təhsil alanadək Azərbaycanda harada oxumusunuz və hansı işlərlə məşğul olmusunuz?

- 2009-cu ildə İlyas Əfəndiyev adına Elitar Gimnaziyadan məzun olmuşam. Daha öncə, Bakı Özəl Türk Liseyində təhsil almışam. Azərbaycan Uşaq Parlamenti layihəsində iştirak etmişəm, hal-hazırda Azərbaycan Gənclər Parlamentinin üzvüyəm.

- Amerikada təhsil almaq üçün hansı proqramla bu ölkəyə getmisən? Bunun üçün hara müraciət etmək lazımdır və hansı sənədlər tələb olunur?

- Amerika Beynəlxalq Təhsil Şurasının (www.americancouncils.az) təklif etdiyi FLEX proqramı vasitəsi ilə burada təhsil alıram. İlkin mərhələdə lazım olan sənədlər - 3x4 sm ölçüdə yeni çəkilmiş fotoşəkil, şəxsiyyət vəsiqəsi və ya doğum haqqında şəhadətnamədən ibarətdir.

- Azərbaycanın Təhsil Nazirliyi Amerikanın ali təhsil ocaqlarını ölkədə qəbul olunan “Xaricdə təhsillə bağlı dövlət proqramı”-nın siyahısından çıxarıb. Buna münasibətin necədir?

- Xatırladım ki, “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” çərçivəsində ancaq bakalavr pilləsi üzrə ABŞ-da təhsil mümkün deyil. Qismən bunu, ABŞ-da bakalavr pilləsi üzrə təhsilin nisbətən bahalı olmasından, başqa bir tərəfdən isə, dünyada ABŞ-ın yuxarı pillələr (magistratura, doktorantura) üzrə daha keyfiyyətli təhsili ilə tanınması ilə əlaqələndirmək olar. Fəqət, bu zamana qədər, kimin isə Harvard, Prinston, Stənford kimi ABŞ-ın məşhur universitetlərinə daxil olub, Dövlət Proqramının qaydaları üzündən təhsilini davam etdirə bilməyən bir insanın belə olması, mənə inandırıcı gəlmir. Odur ki, ən azından cəhd edin, Cənablar!

- Amerikan müəllimləri ilə Azərbaycanlı müəllimləri nə fərqləndirir və nə birləşdirir?

- Birləşdirən dəyər – hamısı Hippokrat andını verməsələr də, vacibliyinə görə ondan geri qalmayan, müəllimlik yükünü öz üzərilərinə götürmüş insanlardır. Fərqləndirən isə, bircə, ayrı-ayrı dillərdə danışmaqlarıdır.

- Amerikada təhsil dedikdə hər kəs Harvard kimi universitetlər haqqında düşünür. Ümumən götürsək yaxşı təhsil almaq üçün Amerikanın hansı universitetlərini seçmək lazımdır? Burda kriteriyalar necə müəyyənləşir?

- ABŞ-da universitet seçimində əsas meyar ixtisasdır. ABŞ- da təhsilin ən güclü cəhətlərindən biri də onun “rəngarəng” ixtisas müxtəlifliyidir. Yəni, ABŞ təhsil sistemində məsələ artıq, təhsilin keyfiyyətindənsə - əksinə, daha çox, düzgün ixtisas seçimindən gedir. Ümümiyyətlə götürsək – Harvard, Stənford, Massaçusets Texnologiya İnstitutu, Prinston, Berkli kimi təhsil ocaqları – təkcə ABŞ-da yox, bütün dünyada öz adlarını təsdiqləmiş universitetlərdir.

- Amerikada əcnəbi tələbənin bir günlük yaşayışı üçün nə qədər vəsait tələb olunur?

- FLEX proqramı çərçivəsində Amerikan ailəsində yaşadığım üçün, bu suala dolğun bir cavab verə bilməyəcəm. Lakin, onu söyləyə bilərəm ki, proqram iştirakçıları üçün ayrılan aylıq təqaüd demək olar ki, bütün cib xərclərimi ödəyir.

- Amerika arzusu (Amerikan dream) deyimi doğurdanmı realdır. Yoxsa hər şey o qədər də asan deyil?