ANN.Az-ın Türkiyə mətbuatına istinadən verdiyi xəbərə görə, Məryəm keçən ay Pakistanda "Əl Qaidə” lideri Üsəma Bin Ladenin öldürüldüyü Abbottabad şəhərində sevdiyi 22 yaşlı Hevad adlı gənclə evlənib. Ancaq onlar evləndikdən sonra böyük bir problem ortaya çıxıb. Məryəmin ölən bacısının əri Əbdül Rəhman "o evlənə bilməz, çünki mənimlə evlidir” deyib. Bu iddia isə Əfqanıstanla Pakistan arasında siyasi və hüquqi problemə səbəb olub.

Məryəm Həvadla birlikdə Kabuldan qaçaraq Pakistana sığınıb. Qaçmasına səbəb kimi gənc qız ailəsinin onu zorla ölən bacısının əriylə evləndirmək istəməsini göstərir. Əbdül Rəhman adlı şəxsin qohumları isə Məryəmin nigahını pozaraq, "Böyük günah” işlədiyini deyir. Elə bu səbəbdən də Əfqanıstan şəriətinə uyğun olaraq ailəsi Məryəmin Əfqanıstana deportasiya edilməsini və cəzalandırılmasını istəyir.

Əbdül Rəhmanın qohumları buna fakt kimi Məryəmin Rəhmanla evli olduğunu göstərən 2006-ci il tarixli nigah sənədi göstərirlər.
Əbdül Rəhmanın qohumları onun Məryəm də daxil olmaqla, üç arvadından 10 uşağının olduğunu deyirlər, onlar həmçinin iddia edirlər ki, Məryəm ölkədən qaçarkən özüylə apardığı iki qızcığaz Rəhmanın uşaqlarıdır. Qohumlar Rəhmanın iflic olduğunu, buna görə də Məryəmin Həvada qoşularaq qaçdığını deyir.

Məryəm isə yanındakı uşaqların bacısının uşaqları olduğunu, Rəhman iflic olduğu üçün uşaqlara uzun illərdi ki, özünün baxdığını deyib. Məryəmin ailə üzvlərinin onu "cəzalandırmaq” təhlükəsi olduğu üçün pakistanlı rəsmilər Məryəmi müvəqqəti olaraq yetimxanada, Həvadın təhlükəsizliyini qorumaq üçün isə onu həbsxanada saxlayırlar.
ANN.Az