“Microsoft” şirkəti və internetin ən iri sosial şəbəkəsi “Facebook” “Microsoft Office” sənədləri yaratmaq və redaktə etmək, eləcə də onlarla “Facebook”dakı dost və həmkarlarla bölüşmək imkanı verən yeni “Docs.com” adlı pulsuz servis yaradır.

“Word”, “Excel” və “PowerPoint” formatlı sənədləri dəstəkləyən servis bu cür sənədləri personal kompüterdən yükləmək imkanı verir.

“Docs.com” özündə “Google Docs” servisinin analoqunu əks etdirir.
Hazırda servis dəvətlər üzrə qapalı beta-test mərhələsindədir. Rəsmi istifadəyə verilmə tarixi hələ açıqlanmır. Servisin köməyi ilə “Microsoft” ofis əlavələri bazarındakı mövqeyini möhkəmləndirəcək, “Facebook” isə istifadəçilər üçün daha funksional və rahat olacaq.

Xatırladaq ki, “Office 2010” paketi ilə birgə “Microsoft” baza funksionallığına malik “Office Web” pulsuz veb-əlavələr paketini də buraxmağı planlaşdırır. “Docs.com” da bu layihənin bir hissəsidir. “Facebook”un 400 milyon istifadəçisi isə “Microsoft”a “Google” ilə mübarizədə kömək edəcək.