Kanadada uzun müddətdir, aparılan araşdırmalar nəticəsində məlum olub ki, uşaq yaşlarında televizora çox baxmaq gələcəkdə həmin şəxslərdə mənfi təsir buraxır. Belə ki, gündə iki saatdan artıq televizora baxan uşaqlar on yaşına çatdıqları zaman daha az hərəkətli olur, dərslərdə çox passiv iştirak edir və riyaziyyat fənnində uğur qazana bilmirlər. Habelə, belə uşaqların gələcəkdə artıq piylənmədən əziyyət çəkdikləri vurğulanıb.
Araşdırmanın nəticələri ABŞ-ın “Arxivs of Pediatrik and Adoloskent Medisine” jurnalında dərc edilib. Montreal Universitenin professoru Linda S.Paqani bildirib ki: “Uşaqlar zehni inkişafı əsasən erkən yaşlarda tamamlayırlar. Davranışlar da erkən yaşlarda müəyyən edilir. 1314 uşaq üzərində bu istiqamətdə uzun müddət araşdırma apardıq. 2-5 yaşlı uşaqların ailələrindən gündə nə qədər televizor izlədiklərini müəyyən etmək üçün siyahı hazırlamalarını tələb etdik. 8 ildən sonra hal-hazırda 10 yaşında olan uşaqların müəllimlərindən onların davranışları və müvəffəqiyyətləri haqda soruşduq. Bəlli oldu ki, 2-4 yaşlarında ikən iki saatdan artıq televizor izləyən uşaqlar digərləri ilə müqayisədə dərslərə daha laqeyd yanaşır və riyaziyyat fənnində də uğur qazana bilmirlər. Habelə, belə uşaqların dostları ilə tez-tez problemlər yaşadığı, digərləri tərəfindən məsxərəyə qoyulduqları və təziqə məruz qaldıqları müəyyən edilib”.