“Microsoft” şirkəti “Windows 7” əməliyyat sisteminin yeni variantını hazırlayıb.

Yeni yaradılmış “Windows Embedded Standard 7” versiyası televizorlar, telequrğular, reklam video-displeyləri, bankomatlar və digər geniş spektrli qurğular üçün nəzərdə tutulub.

Yeni platforma San-Xose şəhərində Silikon Vadisində keçirilən ESC konfransı zamanı təqdim olunub. “Windows Embedded Standard 7”ni əvvəlki versiyalardan fərqləndirən bir çox üstünlüklər arasında platformanın qurğularda “Windows Media Center” proqramını istifadə etmək imkanı verməsi, sensor üsulu və jestlə idarə olunma texnologiyasını dəstəkləyən istifadəçi interfeysi, elektrik qidalanmanın təkmilləşdirilmiş idarə olunma texnologiyası, yüksəldilmiş təhlükəsizlik göstəriciləri, eləcə də işin davamlılığı və stabilliyini qeyd etmək olar. Əməliyyat sistemi 32- və 64-bitlik prosessorları dəstəkləyir.

“Microsoft-un Windows Embedded” layihəsinin baş direktoru Kevin Dallas deyib ki, “Windows Embedded Standard 7” platformasını təqdim etməklə “Microsoft” istehsalçı və müəssisələr üçün “Windows 7” texnologiyalarının xüsusi avadanlıqlara inteqrasiyası istiqamətində yeni addım atıb.