“FİFA U17” ilə əlaqədar polis gücləndirilmiş iş rejiminə keçib.
Gün.Az Bakı Şəhər Dövlət Yol Polisi İdarəsinin (BŞDYPİ) ictimaiyyətlə əlaqələr şöbəsinin rəisi Vaqif Əsədovun sözlərinə istinadən xəbər verir ki, bu gün 17 yaşlı qızlar arasında Azərbaycanda start götürəcək futbol üzrə dünya çempionatı ilə əlaqədar respublikanın avtomobil yollarında, habelə Bakı şəhərində bir sıra yollarda nəqliyyatın hərəkəti məhdudlaşdırılıb.

Belə ki, Nərimanov rayonu ərazisindəki “Tofiq Bəhramov” adına, Nizami rayonunda “Şəfa” və “8-ci kilometr”, stadionları, Səbail rayonunda Bayıl, həmçinin Xəzər rayonunda “Dalğa Arena” stadionlarının yerləşdiyi ərazi və ona bitişik küçə və yollarda avtomobillərin hərəkətinə məhdudiyyət qoyularaq istiqamət dəyişdirilib.

Bundan başqa, Salyan şosesi, 20-ci sahə, Azneft meydanı, Neftçilər prospekti, Yusif Səfərov küçəsi, 10-cu zavod dairəsi, Heydər Əliyev prospekti, Hava Limanı şosesi, Buzovna şosesi və həmin marşrutla geriyə Koroğlu körpüsü ilə Qara Qarayev prospekti, Naxçıvanski küçəsi, həmçinin Azadlıq prospekti, Zərifə Əliyeva, Rəsul Rza, İstiqlaliyyət, 10-cu park, Lermontov, Teymur Elçin, Mehdi Hüseyn, Mikayıl Müşfiq küçələri, Qurd Qapısına və İnşaatçılar, Hüseyn Cavid və N.Nərimanov prospektləri, Bakıxanov, Ceyhun Hacıbəyli, Dəmirçizadə küçələri, Qələbə meydanı və Xətai prospekti istiqamətlərinə şəxsi avtomobillərin hərəkətinə məhdudiyyət qoyularaq istiqamət dəyişdirilib.

Şöbə rəisi həmçinin, yük avtomobillərinin saat 08:00-dan axşam saat 21:00-dək Bakı şəhərinə girişinə qadağa qoyulduğunu və dünya çempionatının keçirilməsi ilə əlaqədar yarana biləcək sıxlığı nəzərə alaraq sürücüləri həmin qərara əməl etməyə çağırıb.

BŞDYPİ rəsmisi şəxsi nəqliyyat vasitəsi sürücülərinə də müraciət edərək çempionat ərzində ictimai nəqliyyata daha çox üstünlük vermələrini xahiş edib.