Paytaxtda "Gənclik” metro stansiyasının yaxınlığında, "Qələbə meydanı”nda tunel tikintisi üzrə işlər intensiv davam etdirilir. İş icraçısı olan "Akkord” Sənaye Tikinti İnvestisiya Korporasiyasının ictimaiyyətlə əlaqələr şöbəsindən verilən məlumata görə, layihənin birinci mərhələsində, yəni 2013-cü ilin mayınadək 6 tunelin istifadəyə verilməsi nəzərdə tutulur. Artıq "Gənclik” metro stansiyasının iki çıxışının istiqaməti dəyişdirilib. Həmçinin "Qələbə meydanı”nda tunellərin üzərində parkın salınması da planlaşdırılır.

Layihə ərazidə 6 tunelin, 10 piyada keçidinin inşasını və əlaqədar yolların genişləndirilməsini nəzərdə tutur. İlk olaraq "Gənclik” metrostansiyasının Atatürk prospektinə çıxan girişinin "Qələbə meydanı”nın mərkəzinə doğru yerdəyişməsi həyata keçirilib. F.Xoyski küçəsini N.Yusifbəyli küçəsilə birləşdirən yol hissəsi tamamlanaraq istifadəyə verilib. Tunellərin ümumi uzunluğu 2 min 766, ümumi sahəsi isə 35 min 563 metrdir. Ərazidə işlərin aparılması üçün "Akkord” Korporasiyasının müvafiq mütəxəssislər qrupu, 300-ə yaxın işçi qüvvəsi və 40-a yaxın xüsusi texnikası fəaliyyət göstərir.

Qeyd edək ki, layihəyə 2010-cu ilin aprel ayından başlanılıb. Layihədə Atatürk və Vaqif prospektlərinin, həmçinin Atatürk prospekti ilə Əhməd bəy Ağaoğlu küçəsi vasitəsilə Təbriz prospektinin birləşdirilməsi nəzərdə tutulur.

Əlavə olaraq Təbriz küçəsilə hərəkət edən maşınlar "Gənclik” dairəsinə girmədən birbaşa tunellə Dərnəgül şosesinə çıxa biləcək, həmçinin F.X.Xoyski prospektinə qısa döngələrlə istiqamətlənmək də mümkün olacaq.

Eyni zamanda, Vaqif prospektindən gələn maşınlar F.X.Xoyski prospektinin altından keçərək, Atatürk prospektinə çıxacaq. Layihənin tam həyata keçirilməsilə "Gənclik” dairəsində avtomobil sıxlığının aradan qaldırılmasına, ərazidə avtomobillərin maneəsiz və işıqforsuz hərəkətinin təmininə nail olunacaq. İşlərin birinci mərhələsi 2013-cü ilin mayında başa çatdıqdan sonra 2-ci mərhələyə start veriləcək.
ANSPRESS